لك عين تسألني عن اللي حصـل لّي
وانت السبب باللي حصل قبل يومين
****
والمشكلة عارف سواتك .. وهاللّي
خلاني أسأل بس وشلون لك عـين؟
****
هذا ويعني انت مــفـروض خـلــي
وشلون لو كنت آنه وانت عدوّين
****
اتـوقع انـك فيني شـــرق ابتصلّي
لا واحســـافة فينا كلمة (حبيبين)
***
مثلك تحمد ربه لمّـا وصـل لّـــــي
إتحمد الله !! يحسدونـك مـلايـيـن
هناك 22 تعليقًا:
محامي
.......
الحمد لله .. وعل نبي صلي
رب رزقنا احلى المزايين
مابدله والله لو وش حصلي
مابدله لو حطوا بيدي ملايين
اقول يا بنت... بطنها يللي
قدرج على الراس ...مرفوع وبالعين
اشهقوتج باللي فيكم يهلي
خذي منه الزين وتركي الشين
جانك تسامحني والا تقولي
مسموح ...يكون برقبتي دين
:) سامحيه
لول بو لطيف
ابيك عون يا معود
..........
بولْطيف يعني بذمتك ترضى باللي
خلاّ حبيبه حاير ٍبين أمرين
تكفه عشاني حط نفسك محلّي
شتحس فيه ان همك يصير همّين
بْهالمسائل واقعي دوم حـلّـي
واحد وواحد دايم يساوي اثنين
عندي عزيزة جيتك لي "*حولّي"
بسامحه هالمره ونشوف لي وين
............
* لوووول مو صج مو صج المنطقة اللي انا فيها جنها حولي لووووووووول
لا والله ما أرضى بشي يخلي
احسن الناس .. ما بين نارين
لو انه منج أخليه يولي
بس المسامح .. هم فعل زين
عز الله قدرج يا بنت يللي
انه عشانج اغرّق البحرين
:)
الله يا بو لطيف
صح احساسك
دايما تعرف شلون تسكتني
والله احترت ما ارد شاقول بعد كلامك
الله لا يحرمنا هالتواصل
اتـوقع انـك فيني شـــرق ابتصلّي
لا واحســـافة فينا كلمة (حبيبين)
--------------
هذا الهوى يا بنت الاجواد غلّي
لو تتبعين دروبه لازم تضيعين
والله احترت ما ارد شاقول بعد كلامك
..........................
تقولين تم باللي تقول لي
وتعطينه فرصة ومية وميتين
شقول يا ختي شعد شخلي
الدنيا صارت معفوسة الحين
اللي اعزه بساع يملني
واللي اوده يقطعني سنين
راح الزمن ذاك اللي يخلي
خلي يودني ويهديني العين
صرنا في وقت دلي وملي
وجوكليت وموكليت وكيكه ام دورين
من بعد ما كان دهني محلي
صار دهنا وارد الصين
الناس صارت تركض ورا اللي
يملك عماير ويا الملايين
يارب تلطف بنا وتعلي
ذكرك بلسانا ليوم الدين
وعلى النبي الهادي كلنا نصلي
وعلى الال والصحب والتابعين
لك عين تسأل ..
بعد ما جرحت فيني بالكلام ..
لك عين تسأل ..
بعد ما بيني و بينك من خصام ..
ذكرتيني بهالقصيدة .. :)
خوش كلام .. انتي اللي كاتبته؟
كويتاوي
الله الله الله الله
مواهب مخفية يا جماعة وانا ما ادري عنها
" هذا الهوى يا بنت الاجواد غلّي
لو تتبعين دروبه لازم تضيعين"
لو يت علي صدقني آضيع كلي
بس البْركة عندي بناس ٍ عزيزين
مرورك وتعليقك زاد سعادتي سعادة الله لا يحرمنا هالتواصل
اللهم صلي وسلم عليه
بو لطييييف
الله اكبر .. وصح لسانك
شوي شوي علي صارلي سنه محاربه القلم ماكو مرونه لوووول
بآخذ بشورك واعطي فرصة لخلي
وأشوف شنهو ممكن يصير بعدين
ولا لا اتعجّب من زمانٍ يـطـلّـي
ولاتحسب انه مثل وقت الثمانين
زمـــن يخلـيـنـا نين ويخلـّي
عجالنا به كلبـوهم (ميـانين)
وارد على دعواتك بكل كــلــي
آمين وآمين وبعد هم آمـيـــن
يا هلا والله سيكرت
وللأسف ما اعرف القصيده
بس تشابهنا بالافيه :)
واي انا اللي كاتبتها
نورت البوست ياخوي :)
شوي شوي علي صارلي سنه محاربه القلم
ماكو مرونه لوووول
............
هذا وانت - ما شا الله - من سنة مخلي
القلم وتاركه لك سنين
اشلون لو كنت ماسكه يا خلي
وتكتب من يومها الين الحين
مبدع وفنان ... يارب يخلي
علومك دايمه زينٍ على زين
وبنصحك من قلب لا لا تخلي
القلم من بعد اليوم... موزين
وان كان لابد.. الكيبورد يملي
مكانه ان كنت تضرب بالايدين
حروفه تصدح اه يا ل للي
ومفاتيحه تغني يا ليل ويا عين
ربي حميد ... انه *يكتب و يعلي
من غير حبر ومن غير تموين
ولا ما كانا نكتب غير اللي
يوفر حبرنا .. هم بس حرفين
كاف عليكم وعلى كل أهلي
عين ترعاكم هي أكرم عين
........
* = الكيبورد
الله الله الله يا بو لطيييف
اخجلتني والله
انا شخصيا استسلم لول
تبارك الله تبارك الله
عجز قافي .. وانت ما شاء الله عليك
يا حلات هالتفاعل الله
شي يثلج الصدر بصراحة
عسى الله يحفظك يا رب ولا يحرمنا هالتواصل الحلو
وانتي حسبتي الحب لعب وتسلّي ؟
لا يا بحر احساس .. للحب قوانين
الحب صبر(ن) عالجفا والتغلّي
أما اللي يزعل .. يقعد بروحه سنين
اي والله يتحمد ربه
بس الصراحة صفقة كبيرة لج بنت بطنها ولابو لطيف ماشاءالله عليكم,جنكم تلعبون تنس
الله يحفطكم
حي الله بن همّام وشلون أهليّ
وشلون ارحب ما تكفي دواوين
نورت البوست ياخوي
لا عدمنا هالتواصل
سويته لوووووووووووووووووووووول هذي كلمتي تنس .. حبيبتي والله مشكورة على التشجيع وعسى الله يحفظج يا رب
لا عدمنا هالتواصل يا قلبي
السلام عليكم اختي
مشاء الله كلمات رائعه
ومبارك عليج الشهر وعادج الله على امثاله :)
فارس هوى الكويت
الأروع هو مرورك
علينا وعليك وكل عام وانت بالف خير ياخوي
ما شاء الله
عيني عليج باردة
انتي وابو لطيف ما خليتو مجال ;)
بصراحه اشهد لقلمك واحساسك
الله يحفظج
:)
تراب الكويت
يا هلا وغلا حبيبتي
شهادة اعتز فيها يا اختي
فرحني مرورج يا الغالية نورتي البوستات والمدونة بكبرها
لا خلا ولا عدم
عيدج مبارك
كل عام وانتي بخير
:))
تراب الكويت
وانتي الخير بكل عام حبيبتي
إرسال تعليق