الأحد، 27 يوليو 2008

يارج الله يا بلد

الفكرة تدور برأسي منذ فترة .. وهيجها خبر اختفاء حسين الفضالة
أثر خروجه لصيد السمك ولم يعد ..
و انحط الهم على الهم .. يارج الله يا بلد
..
.
ما أبي احجي سياسه
كل من عقله في راسه
خلـّـوا عنكـم الوناسه
خنحـَجـي إشوي جـد
.
.
.
تذكرون أيـــام أول
مــا نـنـم وما نقوِّل
ما نجذب ما نحـوّل
الحقيقة ونستبـــــد
.
.
.
سابقين الكل كـــنــا
كلـّنـا شيعه وسنـه
لو يغيب بيوم عنّا
واحد.. الثاني يسد
.
.
.
ويوم نـادانا وطـنــــّا
كلـْنا عاونـّا وعِـنـّـا
من بعد الأزمه وحنّا
الوطن "فينا" رِكـد
.
.
.
صرنا أحزاب وفئات
موس ساكن باللهات
نطلب مْن الله ثـبـات
مالنا غيره ســنــــد
.
.
.
ودي أفـهـم يا جماعه؟
لي متى واحنا قطاعه ؟
هذا أفتى وذاك طاعــه
هـذا عصبّ .. ذاك شد
.
.
.
كل يوم بألف حـال
مشكلة..قصة..مقال
هذا سوّه وذاك قال
يعني ما نركد أبد؟؟
.
.
.
بسنا يا اهل الخير بسنا
من كثر همنا يــِبـســنــا
كــل شي منه فلـسـنــا
وين نبنوصل بــعــد؟
.
.
.
كل من عينه عليــنا
يب يشب النار فينــا
وين رحنا ووين يينا
اذبحونا بهالـحــســد
.
.
.
والغريب اللي تمسكن
يا من اقصاه وتمكّن
خذ مكاني .. ويوم دَكّن
دق في أرضي وتــد
.
.
.
كانت العيشة بسيطة
لين قط الكل خيطــه
لي متى الطوفة هبيطة؟
كل شي وله حـــد
.
.
.
بس بقت كلمة أخيرة
للحكومة المستنيـرة
هو طلب ما نبي غيره
ليت تعطينا وعــــد
.
.
.
شوفو حسين الفضاله
وين راح وايش حاله
يعني..بالذمة..سهاله
انه يطلع ما يــرد؟؟
.
.
.
لي متى واحنا نطوّف
بس ندعي ونسـوّف
وضعنا أصبح يخوّف
يــــارج الله يا بـلـد
.
.
.
يارج الله يا بلد
.
.
.
أشوفكم على خير
.
.
.

هناك 35 تعليقًا:

Blog 3amty يقول...

الله يستر ..
وصح السانك ..

بـنـت بـطنـهـا يقول...

بلوق عمتك

يا هلا وغلا صباحك فل ياخوي

وصح قلبك :)

أبو لطيف يقول...

يا أختي هيضتي الشجون
لا أمين ولا مأمون
ما عاد حدن يمون
على حكومة البلد


كل من فينا يصيح
هذا طاح وذاك يطيح
صرنا إحنا بالفصيح
محنا أعيال البلد


ربي رجع كل غايب
مالنا غيرهم حبايب
فرح الشاب والشايب
ما لنا غيرك احد

ويارج الله يا بلد

الزين يقول...

well said

يارج الله يابلد

بـنـت بـطنـهـا يقول...

الله الله يا بو لطيييييييف

اييييييي هذا التفاعل اللي ابيه هني

كفو والله

صح لسانك ياخوي وألف شكر لمرورك الأول .. وان شاء الله ما يكون الاخير

نورت البوست يا بولطيف

بـنـت بـطنـهـا يقول...

الزين يا هلا وغلا

تسلمين حبيبتي

والشكوى لله

شكرا لمرورج نورتيني

aljalawi يقول...

تسلم ايدج يا بطنها
بنت .. الكويت همها
والمصالح ما تهمها
عسى ايامج سعد

.
.

كل شي قلتيه صحيح
المواطن قاعد يصيح
والحكومه مثل الضريح
ساكته ما تسمع احد !

.
.

تقبلي مروري ^_^

Eng_Q8 يقول...

يا سلام عليج

صح لساااانج

وعسى الله يرده سالم غانم لديرته

الأستاذ حمام يقول...

صح لسانج
كلمات رائعة

enter-q8 يقول...

شوفو حسين الفضاله
وين راح وايش حاله
يعني..بالذمة..سهاله
انه يطلع ما يــرد؟؟


مشكورة وصح لسانك

بـنـت بـطنـهـا يقول...

بودي الله الله

اااي جذيه تونسون

متعدد المواهب طلعت يا بودي والله انك مو هين

صح لسانك ياخوووي وألف شكر لمرورك زدت البوست نور :)

بـنـت بـطنـهـا يقول...

مهندسنا

يا هلا وغلا ياخوي

اللهم آمين عاجل غير آجل يا رب العالمين

الف شكر لمرورك احس شي ناقص لما ما اشوف ردك في بوستاتي

الله لا يحرمنا هالطلة

بـنـت بـطنـهـا يقول...

استاذ حمام

يا هلا وغلا ياخوي

سعدت جدا باول زيارة وعساها ما تكون الاخيرة :)

ما اروع من تلك الكلمات إلا حضورك الكريم

نورت ياخوي

بـنـت بـطنـهـا يقول...

الأب الروحي انتر كويت

يا هلا وغلا والله ياخوي

صح بدنك والف شكر لمرورك

اللي بحد ذاته فرح بالنسبة لي

حياك الله :)

Najmah يقول...

اييي والله يارج الله يابلد

صح لساااانج

فارس هوى الكويت يقول...

السلام عليكم اختي

صح لسانج يابنت بطنها الصراحه كلمات
ولا أروع تسلم يمينج
والله يرجع ولدنا حسين
سالم غانم بإذن الواحد الأحد

و
يارج الله يابلد


تحياتي لج وعساج على القوه :)

بـنـت بـطنـهـا يقول...

نجمة

يا هلا وغلا حياج الله حبيبتي نورتيني بهالمرور

لا عدمناه وصح بدنج يا رب

بـنـت بـطنـهـا يقول...

فارس هوى الكويت

يا هلا وغلا اخوي وحياك الله

صح بدنك والف شكر لمرورك واطراءك

سعدت بهذا التواصل الله لا يحرمنا منه :)

Kuwait يقول...

عــانـك الله يـا وطـن
كـل(ن) بهـمه اندفن
وانت أرضـك تـنطعـن
مالـقيت منـهو يـرد

هـذا حسـين الفـضاله
فاقد(ن) مرته وعياله
الوزير مـرتاح بالـه
ومجـلس الأمـه انهـدم

ماطـلع نائـب يصـرح
ولا يسـتـنكر ويـشرح
يطلب استعجال يـفرّح
أويجيب من إيران رد

صرنا لأخبــاره ندوّر
كل من لحالـه يتصوّر
للأسـف الصـدق تحـوّر
حتى الإعـلام إنـعـدم

لوووووووووول مو صج مو صج أول مره ترا اتفلسف وأكتب جذي شعر مادري خاطره مادري شسمها هذي نفسج ..
أدري في بدليات وكسرات لما الراس بس عاد جامليني ;q
تقبلي مروري ..
أنـــا D;

بـنـت بـطنـهـا يقول...

هلا هلا هلا هلا هلا هلا هلا هلا هلا هلا هلا هلا هلا هلا هلا هلا هلا هلا هلا كوييييت

لا لا ما اصدق عيوني

الله الله عليج يا حلاتج ويا حلات كسراتج والله انتي كسورج عندي وزن اصلا

صح لسانج يا قلبي وعودة حميده والله حدي استانست بشوفتج وردتج

بـنـت بـطنـهـا يقول...

يا حلاتج ويا حلات هالتفاعل يا كويت

Kuwait يقول...

بعد عمررررررررررري والله ..
كلامج اهو الي يونسسسسسسسسسسس ..
واااااااي صج صج رفعتي معنوياتي D;
بس لا ترفعين فيني واييييييد لا أصدق روحي وأقعد اكتب شعر لووووووووول .. ;q

the.thinker يقول...

تسلم ايدج وصح لسانج :)

صقر قريش يقول...

أول شي صح لسانج

ثاني شي:

الله يرجع حسين الفضاله سالم غانم لأهله واحبابه ويعين الله يابلد

Sweet Revenge يقول...

ماشا ءالله ,خوش كلام صح السانج

بـنـت بـطنـهـا يقول...

كويت كتبي ليش ما تكتبين

اللي قريته منج افضل من اللي يكتبه وايد مشاهير

بـنـت بـطنـهـا يقول...

مفكرنا

يا هلا وغلا الله يسلمك يا رب وصح بدنك ياخوي :)

بـنـت بـطنـهـا يقول...

صقر قريش

يا هلا والله نورت البوست

صح بدنك ياخوي

واللهم آمين

بـنـت بـطنـهـا يقول...

سويت ريفنج يا هلا والله

حياج الله اختي

صح بدنج والف شكر لمرورج

نورتي البوست

Q8-MaNaL يقول...

امبيه هذا الشعر انتي كاتبته؟ بصراحة روعة روعة روعة والله العظيم،انتي موهوبة حيل ماشالله
صح لسانج و يعطيج الف عافية
والله يرد حسين الفضالة ان شالله بأسرع وقت قولي آمين

بـنـت بـطنـهـا يقول...

اللهم آمين

منال يا هلا وغلا

الأروع مرورج على البوست

لا عدمنا هالمرور

تسلمين يا قلبي على هالكلام

شهادة أعتز فيها :)

تراب الكويت يقول...

ابدعتي
ابدعتي

والله احساسج وصل قبل كلامج

احتفظت بالكلمات لانها فعلا اكثر من رائعة

الله يحفظج قولي آمين :)

بـنـت بـطنـهـا يقول...

تراب الكويت

يا هلا وغلا

المدونة واللي بالمدونة تحت امرج يا اختي ومشكورة على التشجيع والكلام الطيب :)

نورتي

تراب الكويت يقول...

لي طلب صغير وأتمنى ما يضايقج

لو سمحتيلي احط رابط البوست هذا ببلوقي

لانه من اجمل ما قرأت فعلا

بانتظار ردج حبوبة

:)

بـنـت بـطنـهـا يقول...

تراب الكويت
ما طلبتي إلا عزج
وقلت لج المدونة مدونتج ما طلبتي شي
نورتي يا الغالية